Mariėtte wen Fauresmith Uithourit 2012

 Boshof Magersfontein Uithouritklub-lede behaal groot welslae

Mariėtte Visser en haar perd, Ramon Amarula het hierdie jaar die standaardgewig-afdeling van die jaarlikse Fauresmith perde-uithourit gewen. 

Mariėtte is die dogter van Abrie en Elsa du Plessis,  eienaars van die Ramon stalle en Amarula, 'n Arabiermerrie,  kom natuurlik uit hierdie stalle.  Dit was Mariėtte se vierde deelname aan hierdie uithourit en Amarula se eerste. 

Alhoewel Mariėtte en haar man, BW op die plaas Spioenheuvel in die Warrentondistrik woon, is hulle lede van die Boshof Uithouritklub.

Hierdie jaar het 389 perde op die eerste dag van die taai uithourit oor 201 km weggespring, maar teen die derde dag was daar slegs 256 wat hierdie rit voltooi het.   Sommige perde kon nie die veearts-inspeksies slaag nie en ander is vrywillig deur ruiters onttrek.

Benewens hierdie prestasie, het Mariėtte en Amarula ook die volgende toekennings ontvang:

o       Nuweling perd met die vinnigste tyd;

o       Ongeregistreerde perd met vinnigste tyd;

o       Algehele wenner op voorgee;

o       Ruiter wat op Fauresmith Springbokkleure verwerf het in die vinnigste spoed bo die vereiste spoed in die verskillende gewigklasse;

o       Bes-voorbereide perd;   en

o       Twee-ster erekleure vir die eerste plek.

Boshof Magersfontein Uithouritklub en Boshof is baie trots op hierdie prestasie en ook op die prestasie van die ander klublede wat ook groot welslae behaal het.

Henco du Toit en sy perd Hectoria Dakouta is gekies om die Vrystaatspan in die Swaargewig-afdeling te verteenwoordig, en het die rit suksesvol voltooi. Hulle span het ook die algehele derde plek, bronsmedalje, in die spankompetisie behaal.

Christiaan Engelbrecht en sy perd Simone, is gekies vir die ERASA Ontwikkelingspan in die Junior afdeling en hy het ook die rit suksesvol voltooi. Hy het 'n 17de plek in die Junior afdeling behaal en die ERASA ontwikkelingspan is aangewys as die algehele wenners, goue medaljes, in die Junior-afdeling se spankompetisie.

Lean Hayes en sy perd Rose, het ook hulle eerste Fauresmith aangepak, en suksesvol voltooi. Lean het ook die trofee ontvang vir die die ruiter wat die meeste plesier aan die veearts-paneel verskaf het.

Janice Snyman en haar perd, Jamani, word gekies vir die Vrystaatspan se Liggewig-afdeling en behaal 'n 10de plek in dié afdeling. 

Danco Engelbrecht met Patyo ry ook uitstekend en behaal 'n 11de plek in die Junior-afdeling. Simoné Swart met Expose, het ook die rit suksesvol voltooi.

Mariėtte Visser en Amarula Ramon

Christiaan Engelbrecht op Simone   en regs is Henco du Toit en Hectoria Dakouta

Tuisblad